Көрмелер

       2025 жылдың 17 қараша күні Шығыс пен Батыс тоғысқан Сарайшық: Ұлы даладағы тарих және мәдениет халықаралық симпозиумы аясында Салтанат сарайында Атырау облыстық тарихи-өлкетану музейінің қорынан «Сармат алтындары» атты көшпелі көрме ұйымдастырылды. Көрмеге 2023–2024 жылдары Атырау облысы Қызылқоға ауданы, Қарабау ауылы маңындағы Қарабау-2, Қарақұдық-1 және Қарақұдық-2 қорғандарында жүргізілген археологиялық қазбалар кезінде табылған бірегей жәдігерлер қойылды.

     Ұсынылған артефактілер ерте кезеңдерде Атырау өңірін мекендеген Сармат тайпаларының өркениет деңгейін, олардың көшпелі қолөнерін, әскери мәдениетін және діни-ғұрыптық дәстүрлерінің жоғары дамуын айқын көрсетеді. Жәдігерлер б.з.д. V–IV ғасырларға жатады.

Көрмеде келушілер назарына ұсынылғандар:

• қос жолбарыс пен қос арқар бейнесі бар алтын тоға;

• екі ұшында барыс мүсіні бейнеленген алтын білезік;

• алтын тұтқасы бар сынама тас;

• алтын умбондар;

• аң стиліндегі алтын жапсырмалар;

• алтыннан жасалған бір орамды алқа, білезік, сырға;

• күн және жарты ай бейнелі салпыншақ сырғалар;

• аң стилінде жасалған ағаш ыдыс жапсырмалары және басқа да құнды жәдігерлер.

Көрме симпозиум қонақтарына Сармат мәдениетінің бай да құнды мұрасын жақыннан танып, оның тарихи-мәдени ерекшеліктерін тереңірек сезінуге мүмкіндік берді.