Атырау облыстық тарихи өлкетану музейінің іргетасын қалау рәсімі
Жаңа музей ғимаратының алғашқы іргетасы қаланды. 2025 жылдың 29 тамыз күні Мемлекет басшысы Қасым-Жомарт Кемелұлы Тоқаевтың тікелей бастамасы және қолдауымен Атырау қаласында 1200 орындық концерт залы мен Атырау облыстық тарихи өлкетану музейінің алғашқы іргетасы қаланып, капсуласы салынды. Бұл - өнер мен өркениеттің алтын бесігіне айналатын, шығармашылық ұжымдарға шабыт, жас дарындарға қанат бітіретін, халқымыздың мәдени мұрасын ұлықтайтын қасиетті орда болмақ.
Атырау облысының әкімі С.Шәпкенов құттықтау сөзінде: “Атырау өңірі - өнер мен мәдениетке бай өлкенің бірі. Қазіргі біздің қаланғалы отырған мәдени орталық үш бөліктен тұрады: облыстық тарихи-өлкетану музейі, 1200 орындық заманауи киноконцерттік зал, Қазақтың қара домбырасының бейнесімен бейнеленген Құрманғазы атамыздың атымен аталатын орталық бой көтереді” - деді. Күйші-домбырашы, Қазақстанның Халық әртісі А.Үлкенбаева: “Тарихы тереңнен сыр шертетін киелі мекеніміз Атырауда екі бірдей нысанның іргетасы қаланғалы отыр. Бұл заманға сай сәулеттік ғимараттарда болашақ ұрпақтар елдің тарихын, бабалардың жолын танитын, халықтың рухын көтеретін, қазақтың әні мен күйі асқақтайтын киелі орынға айналады” – деді. Бұл ғимараттар өзінің ауқымдылығы жөнінен Қазақстандағы ірі мәдениет мекемелерінің қатарынан орын алып, халқымыздың бай тарихи-мәдени мұрасын жинақтау, жүйелеу және көпшілікке насихаттауда танымал рухани орталықтардың бірі болады деп есептейміз. Бұл тек архитектуралық нысан емес, рухани жаңғырудың жарқын көрінісі, ұлт мәдениетінің алтын көпірі, өнер мен өнегенің ордасы болмақ. Көптен күткен Мәдениет орталығының іргетасын салтанатты түрде Атырау облысының әкімі С.Шәпкенов, Ардагерлер кеңесінің төрағасы М.Өтешов, күйші-домбырашы, Қазақстанның халық әртісі А.Үлкенбаева қалады. Атыраулықтар үшін – рухани нәр алатын, ұлттың ұлы мұрасын насихаттайтын мәдени орталық болары сөзсіз. Бұл тарихи сәт – болашақ ұрпаққа қалатын асыл мұраның бастауы болғай!
