Қазақстан аумағында тұңғыш рет кездесіп отырған тарихи құндылықпен арнайы танысу үшін Атырау облыс әкімі Махамбет Досмұхамедов Атырау облысы тарихи-өлкетану музейінде болды.
Атырау облысы тарихи-өлкетану музейінің мамандары маусым-шілде айларында Миялы қорғандар жүргізген қазба жұмысы барысында басынан аяғына дейін өте ерекше үлгіде темір сауытпен жабдықталған, ұзындығы 175 см, қабірінің ұзындығы 2м 40см, ені 80 см болатын ер адамның мүрдесін тауып, арнайы тасымалдау арқылы музейге әкелген болатын. Әзірге мүрде жанынан ұзындығы 1 метр болатнын семсер, жебе ұштары мен қорамсабы, қалқаны, патера, сүейекпен өрнектелген ат әбзелдері табылып отыр.
Қазақстанның еңбек сіңірген қайраткері, Халықаралық дәрежедегі қалпына келтіруші, «Қырым аралы» ғылыми-зерттеу орталығының басшысы Қырым Алтынбековтің айтуынша: «Қазақстанда дәл осы іспеттес тарихи құндылық әлі бірді-бір рет табылған жоқ. Мүрденің басынан аяғына дейін темір сауытпен жабдықталуына қарағанда, оның жауынгер болуы әбден мүмкін».
Табылған тарихи құндылықтың құндылығын жойып алмау үшін музейдің археолог мамандыры «Қырым аралы» ғылыми-реставрациялық зертханасының қызметкерлерімен бірлесіп, ғылыми-зерттеу жұмыстары жүргізілуде.
Рентген және металл іздегіш құрылғылардың көмегімен жасалған зерттеу нәтижесі бойынша алтын, темір, сүйектен жасалған бұйымдардың бар екенін анықталды.
Алдағы уақытта табылған жәдігерлердің тарихи құндылығын анықтау мақсатында арнайы сапараптамалар, антропологиялық, ДНК-лық зерттеулер жүргізіліп, зерттеу нәтижесі бойынша қайта қалпына келтіру жұмыстарын жүргізу жоспарланып отыр.
